اماني الياسمين انت دائي ودوائي الجزء الاول ج٣

قال طارق بسخريه: الكبير كبير بأفعاله
أمسكه حمزه من ياقة قميـ,,ـصه بشده وقال من بين أسنانه : لو مكناش فى مستشفى والظروف الى احنا فيها كنت عرفتك ازاى تكلم أخوك الكبير
تركه حمزه ونظر لها نظره مليئه بالغضب وقال: أمشى يا طارق ،وجودك مش مرحب بيه دلوقتى
طارق : ليه عشان بنبهك لأفعال ممكن تأذى المسكينه الى جواه
وهنا صاح حمزه: انا ما بعملش حاجه غلط ولا عندى افعال ممكن تأذى رنا
طارق : اكبر دليل على غلط انك اتنرفزت عليه دلوقتى ،بدل ماتقولى بكل هدوء هى مين
حمزه: انا مش هقولك عشان انا مش مطالب ابررلك تصرفاتى ولا انت وصى عليه
طارق : عارف ياحمزه لو الى انت بتعمله ده هيأذيك انت يمكن مكنتش اهتم لكن الى انت بتعمله هيأذى رنا
وهنا هتف حمزه: وانت مالك برنا
طارق: عشان …. وتدارك خطأه انه كان للتو سيعترف له انه يحبها فسكت
حمزه: ايوه عشان ايه
طارق : عشان هى زى اختى ،عشان فى بينا رابط دم بالقرابه وبدمى الى بيجرى فى جـ,,ـسمها
حمزه بهدوء : روح يا طارق …. روح انت كده عملت الى عليك وماعتقدش اننا هنحتاج خدماتك تانى
قال ذلك حمزه وتركه وذهب بأتجاه الطبيبه
…… … …………………………….
وصل حمزه ورنا الى منزلهم بعدما سمحت لهم الطبيبه وذهبت معهم زينب لتراعى رنا فى فترة نفاسها
دخلت رناغرفتها مستنده على زوجها الذى ساعدها للاستلقاء على الفراش
قال حمزه بعدما ساعدها على الاستلقاء: أحسن
رنا : اه
حمزه : حاسه بحاجه بتوجعك
حركت رنا رأسها يميناً ويساراً وقالت : لأ
حمزه : هتنامى
أومأت رنا بالموافقه
لم يتركها حمزه ولكن جلس بجانبها وأمسك بيديها وقال : رنا حبيبتى ،بصى لى
نظرت له رنا فأكمل : اتكلمى معايه ،قولى لى اى حاجه تخطر على بالك
رنا: كان شكلها ايه
تنهد حمزه ولكنه قال: مش عارف ، كانت شبه كل البيبهات ،كلهم بيبقى ليهم نفس الشكل تقريبا لما بيتولده
رنا : وعنيها ،لونهم ايه
سكت قليلاً لا يعلم أيجاريها ويجاوب على أسئلتها ام يتوقف وف النهايه قرر ان يجاوبها لعل ذلك يخرجها من الحاله التى بها
حمزه: ماشفتش عنيها يارنا عشان كانت مغمضه
رنا : هى نزلت ميته
حمزه : نزلت صاحيه لمدة دقيقتين
وهنا صاحت رنا بغضب: طب وليه ما أنقذهوش
أمسكها حمزه من ذراعيها بهدوء وأعاد رأسها الى مكانها على الوساده : لو كان بأيدهم ينقذهوها مكنوش أتأخروا ،بس ده قدرها
رنا: صح قدرها وقدرى
حمزه: قدرك
رنا: ايوه قدرى … قدرى انى فرحتى دايماً تبقى ناقصه … كل لما أفرح تحصل حاجه تبوظ فرحتى وتعكنن عليه وكأن … وكأن الفرح مستكتر نفسه عليه
ضم حمزه رأس رنا الى صدره : ليه بتقولى كده يا رنا … انا معاكى وبنتنا هتبقى كويسه وهترجع البيت وتنوره وان كان على … ان كان على البنت الى اتوفيت فدى رحمه من عند ربنا هتاخد بأيدينا وتدخلنا الجنه ان شاء الله ،فى احسن من كده ف الدنيا
رفعت رنا رأسها وقالت : وليه ماقلتش هنجيب غيرها ولا انت خلاص مابقتش عايز ولاد منى
شعر حمزه بنغز ف صدره من كلماتها وقال بتلعثم : ليه بتقولى كده … بس لسه بدرى ع الكلام ده
رنا: لأ ،انا بقولك من دلوقتى انا مش هاخد مانع للحمل ، انا عايز طفل تانى وبسرعه
حمزه وهو يحاول ان يقول بصوت متزن : مش وقته الكلام ده ، نطمن على هنا الأول
كان سيبتعد عنها ولكنها تشبثت بقمـ,ـيصه ونظرت له نظره كلها توسل وقال : حمزه ، انت لسه بتحبنى وعايزنى صح
أمسك حمزه براسها بين كفيه وقال : ليه بتقولى كده يا رنا ، طبعاً عايزك وعايزك اكتر من الاول وكل يوم بحبك اكتر من الاول ومش ممكن اتخيل حياتى من غيرك
رنا : وعايز منى ولاد تانى
أبتلع حمزه ريقه بصعوبه وقال : طبعاً ، … أكيد
أبتسمت رنا أبتسامه خاويه وقالت : ربنا يخليك ليه
حمزه وهو يقبلها على جبينها ويساعدها على النوم : ويخليكى ليه ياحبيبتى
…………………………………….
فى خلال الثلاث ايام السابقه واظبت رنا رغم تعبها على زيارة أبنتها فى الرعايه كل يوم حتى انهم فى اليوم الثالث سمحوا لها ان ترضعها قطرات قليله من اللبن الذى حافظت عليه رنا كما علمتها والدة زوجها بتعصير صدرها كل يوم
اليوم سمح لها الطبيب ان ترضعها قطرات صغيره
جلست رنا على كرسى وأمسكت بطفلتها لأول مره بين يديها ونظرت له ،كما كانت صغيره وعندما فتحت عيونها كانت عيونها عسليه جميله هى تعلم انها لا تراها ولكنها كانت تشعر انها تنظر لها ،نظرت رنا الى الكائن الصغير فى يديها وقربتها من صدرها وبعد عدة محاولات فاشله أستطاعت الصغييره التشبث بصدرها وبدأت تحارب لترتشف قطرات اللبن
لم تتمالك رنا نفسها وهى ترى ابنتها ملتصقه بها بعيونها العسليه الجميله وشعرها الأسود الناعم التى ورثته عن أبيها وشعرت بالدموع التى أحتبستها تنزل منها منهمره على خدها بشده
بدأت رنا البكاء بدموع قليله وبعدها بشده وبعد ذلك أصبحت شهقات متقطعه
أنتبه حمزه لشهقات رنا ووللطفله التى تركت صدرها وبدأت بالبكاء ،لذلك سحب حمزه الطفله من يديها وناولها للممرضه وأحتضن رنا بشده وهى تبكى وهو يربت على ظهرها
رغم ان بكاء رنا يكاد يقطع نياط القلب الا ان حمزه كان سعيد بأنها أخرجت ما بداخلها أخيراً
رجع حمزه ورنا الى منزلهم ليلاً وقابلتهم زينب التى قلقت من منظرهم ولكن حمزه أشار لها ان تصمت ولا تسأل عن شئ
ساعد حمزه رنا على النوم وعندما أطمئن انها نامت خرج لوالدته
زينب : فى ايه يابنى ،طمنى
حمزه: سمحوا لرنا انها ترضع البنت
زينب: طب يا ألف نهار أبيض امال ايه الى زعلكوا … يكونش صدرها نشف دانا منبه علييه تعصروا كل يوم
حمزه: اول مامسكت البنت انهارت وأعدت تعيط .. أخيراً أفتكرت البنت الى ماتت وعيطت عليها
زينب: وده الى مضايقك ولا يهمك ،ده كده أحسن بكره تروق وتفوق وتبقى زى الفل أسألنى انا العياط بيريح والكتمه وحشه
حمزه: انا عارف بس قلقت عليها كان شكلها صعب اوى ، وكانت تعبانه اوى ومقدرتش بعدها ترضع البنت
زينب: لأ ما طاوعهاش مدام البت رضعت منها يبقى خلاص تبقى لازماً ترضعها كل يوم
حمزه /: مش عارف يا أمى بس هى لو كل مره عملت كده مش عارف هقدر أخدها تانى للبنت ولا لأ
زينب: لأ ماتقولش كده انت لازماً تقويها وتقف جمبها وتخليها تروح وبعدين مهو كده كده البت مسيرها تخرج من المستشفى ولا هتفضل طول عمرها هناك
حمزه: لأ هتخرج ان شاء الله الدكتور قالى يومين او تلاته بالكتير ويخرجوها
زينب: طب بركه .. روح يابنى روح نام جمب مراتك وبكره تروح شغلك تانى كفايه كده انت اتعطلت اليومين الى فاتوا كتير وانا بكره هروح انا مع رنا المستشفى
نظر لها حمزه نظره بمعنى الرفض
زينب: ماتخافش والله ما هقولها كلمه تضايقها لو هو ده الى انت خايف منه
حمزه : انا ماقلتش كده يا أمى بس
زينب: بس انا فهمتك من عينك يا حبيب امك
حمزه: أمى رنا مرت بظروف صعبه ومش عايزه حاجه تجرحها هى مش ناقصه
زينب: لا هو انت فاكر انى قلبى حجر للدرجه دى مهما حصل انا أمك ياحمزه وان كنت عايزه الولد فده عشانك يابنى عشان يبقى بعدك ويخلد اسمك زى ماعملت مع أبوك بس مش لدرجة انى أضايق رنا وهى حته منها راحت ياعين امها ومقهوره عليها ، وبعدين ان شاء الله المره الجايه تبقى واد
نظر لها حمزه نظرة خواء وقال : ان شاء الله … انا قايم انام



