اماني الياسمين انت دائي ودوائي الجزء الاول ج٤

رنا بتماسك رغم ارتجاف جـ,,ـسدها:جيت ليه ياحمزه
وضع حمزه يديه ف جيوبه قائلا:هو فى مانع عندك انى اجى ازور بلدى
رنا وهى تتحرك ماشيه من امامه : طيب … اتفضل زور بلدك براحتك

وقبل ان تتحرك من امامه كان ممسكا بذراعها وقال بشراسه:جيتى مع مين يارنا

نفضت رنا ذراعها وقالت وهى تكتف ذراعيها امام صدرها وقالت:انت بتسأل ولا عارف وعايز تسمع منى
حمزه:مع مين يا رنا
رنا:مع طارق ياحمزه
حمزه:وايه الى خلاكى تيجى معاه .. انا كنت متوقع انك رحتى اسكندريه عند اخواتك وبعدها اتفاجئت بىامى بيكلمنى قلقان عليكى عشان تليفونك مقفول من يومين … تخيلى منظرى وانا مش عارف ارد عليه اقوله ايه لانى ببساطه مش عارف هى فين واتفاجئ بعدها ان جدك بيكلمنى ويقولى انك هنا

نظرت له رنا بألم وقالت:يعنى انت هنا عشان جدى اتصل بيك
حمزه:مش مهم انا هنا ليه … المهم انى هنا
هتفت رنا بألم وقالت:لأ مهم … مهم على الاقل بالنسبه لى … مهم لان كان فى حته جوايه كانت لسه بتفكر بغباء وفاكره انك كنت بتدور عليه او فارق معاك عدم وجودى … بس للأسف خيبت ظنى زى عادتك .. ثم اضافت بشراسه وهى تمسح دموعها بعنف:ايوه جت مع طارق ياحمزه جيت عند الناس الوحيده الى بحس معاهم انهم بيحبونى بجد كنت محتاج احس بده ودلوقتى … لجأت لطارق لانى مكنتش عايز حد من اخواتى يعرف لانهم ببساطه كانوا هيسألوا ليه سبنا بعض وانا ماينفعش احكى ومش هحكى

حمزه :انتى ال اخترتى تخرجى من حياتى يارنا انا لا طلبت منك تخرجى ولا عمرى كنت هطلبها
رنا بأستنكار:حياتك…. هو انا كنت ف حيلتك اصلا ياحمزه انا اكتشفت انى كنت عايشه على الهامش وواهمه نفسى انى كنت حاجه مهمه فى حياتك
حمزه:رنا …. انتى عارفه كويس اوى ان الى بتقوليه ده غلط وانى انا عمرى مااعتبرتك هامش فى حياتى .. الى انتى شفتيه ده هو الى هامش فى حياتى … حاجه ملهاش اى معنى

رنا:بس عندى ليها معنى ومعنى واحد بس ومعناها هى الخيانه … الخيانه ياحمزه

حمزه:انا تعبت من الكلام ف الموضوع ده واظاهر انك متشبثه بالى ف دماغك ومش متنازله عنه
رنا بتحدى:ايوه بالظبط كده … زى مانا متشبثه بالطلاق كمان
حمزه وقد تحولت نظرته للغضب وقال بشراسه:عايزه تتطلقى .. ماشى يارنا بس تسبيلى بنتى
رنا متفاجئه:بنتى
حمزه:اه بنتك …. هنا يارنا … انتازلى عن هنا وانا أطلقك

نظرت له نظره مليئه بالألم وقالت :انت كنت مخبى القسوه دى عنى فين ..ازاى ماشفتهاش قبل كده
حمزه:قلت لك قبل كده انتى بس قادره تخرجى احسن مافيه وأسوء كمان مافيه
رنا وقد غلبتها دموعها وانهار تماسكها :عايز تاخدها منى وانت عارف انى عمرى ما هعرف اخلف غيرها …. عارف انى عمرى ما هعرف تانى اكون أم … عايزه تاخدها منى وانت ممكن تتجوز غيرى وتخلف عشر ولاد غيرها … بس انا …. بس انا لأ
جزع حمزه لمنظر انهيار رنا امامه وشعر انه لا يقوى حتى على الحديث
اكملت رنا منهاره وقد تعالت شهقاتها :ليه ياحمزه … انا عملت لك ايه عشان تعـ,,ـذبنى كده …. ليه ياحمزه ليه

قالت ءلك وانهارت باكيه على الارض ووضعت وجهها بين كفيها لتبكى بشده

جلس حمزه على ركبتيه بجانبها وعندما وضع يديه على رأسها أبتعدت بشده عنه حتى لا يلمسها

حمزه: رنا … رنا ممكن تهدى … طب بصيلى يا رنا .. اسمعينى واوعدك انها آخر مره هضايقك بوجودى

سكتت رنا من بكائها ولكنها لم ترفع رأسها لتنظر له

تنهد حمزه وقال :رنا انا مش هينفع اطلقك … سميها انانيه منى بس مش هعرف انطقها … هبعد عنك هبعد خالص لغاية لما تهدى ونتكلم بس سامحينى مش هقدر اطلقك ….

قال ذلك ووقف وسار خطوتين للأمام ثم التفت اليها وقال :على فكره انا عرفت من اليوم الى وصلتى فيه البلد انك هنا حتى من قبل ماجدى يكلمنى … عشان انا مكنتش ههدى ولا كنت هعرف انام الا لما كنت هعرف انتى فين وبأمان ولا لأ …. يعنى بلاش تقـ,,ـتلى الجزء الصغير الغبى الى لسه مؤمن بيه ولسه متأكد انى بحبك وانك اهم حاجه بالنسبه لى … انا ماشى يارنا وسايبلك بنتى حته منى ومنك مش هاخدها منك بس اسمحيلى ابقى أشوفها من وقت للتانى .

ثم التفت وتركها وذهب ……

آخر روايه انت دائي ودوائي
تحياتي
( الحلقه الثامنه والثلاثون )
ردت رنا بعزم :حمزه مبقاش يخصنى ولا انا بقيت أخصه
نظر لها طارق مليا وعندما وجدها تشيح بوجهها ناحية النافذه مره اخرى عاد مره اخرى ينظر للطريق امامه

مر الوقت ورنا وطارق صامتين … قال طارق ليكسر الصمت وهو يتطلع لهنا فى الخلف : هنا نامت
التفت رنا لابنتها التى كانت نائمه فى كرسيها براحه :اه … هى كده لما بتركب العربيه بتنام
ضحك طارق وقال:زيى … لما بكون مش انا الى سايق اول ما بتمشى العربيه بنام
رنا:اظاهر انها واخدك كتير منك
طارق بعدم فهم:ليه بتقولى كده
رنا بارتباك:هو .. كان .. حمزه بيقول انها شعرها زى شعرك
طارق وهو يمسح على رأسه مبتسما:يمكن … بس زمان بئه دلوقتى ظروف شغلى بتخلينى دايما اقصره .. كان زمان مسمينى الظابط ابو أوصه…تخيلى كده واقف بثبت مجرم عشان مايهربش وهوب ينزل شعرى على عينى .. اجى ارفعه … الاقى الحرامى هرب

ضحكت رنا برقه ..فنظر لها طارق وسرح فى جمال ضحكتها
شعرت رنا بغرابة نظرات طارق لها فخجلت وأشاحت بوجهها مره اخرى الى النافذه

بعد قليل رن هاتف طارق فالتقته لينظر الى اسم المتصل ثم نظر الى رنا وهو يقول بتوتر:ده حمزه
اعتدلت رنا فى جلستها وقالت وهى تفرك يديها:هو متعود يكلمك بدرى كده
طارق:لأ
رنا:يبقى اكيد عرف انى معاك
طارق:لأ طبعا وهو هيعرف منين
رنا:مش عارفه
طارق:ممكن تهدى … اكيد فى سبب مخليه يتصل انا هرد عليه على الاسبيكر بتاع العربيه بس ماتعمليش صوت
فتح طارق الخط وقال بصوت متوتر:الو
حمزه بصوت بان عليه التعب:طارق
طارق:ايوه ياحمزه
حمزه:انت فين؟
سكت طارق قليلا وقال:اييه … انا
وقبل ان يكمل قال حمزه:فى البيت ولا نزلت يعنى
طارق:نزلت
حمزه:اه… اصل … هى امى كويسه؟
طارق:اه كويسه …ليه بتسأل
حمزه:يعنى شفتها قبل ماتنزل
طارق:اه صبحت عليها قبل ما انزل
حمزه:كانت لوحدها
طارق وقد فهم انه يسأل بطريقه غير مباشره عن رنا فقال:اه كانت لوحدها ..مين الى هيكون معاها

حمزه مغيرا للموضوع:هى هناء هتوصل امتى
طارق:بعد بكره
حمزه:ماشى ياطارق … سلام
طارق:سلام

بعدما اغلق طارق الهاتف قال لرنا:من الواضح انه كان عايز يعرف انتى عندنا ولا لأ
نظرت له رنا ولم ترد