رواية حدود القدر الجزء الثاني

بقلم شيماء عبد الحميد

**
كانت قاعده سرحانه وحزينه في كل اللي حصل معاها ،قرب منها علي وسألها
-هتقدري تتحملي عصبية حسام ياود؟
-مش فاهمه
-هتقدري تتحملي قد اي؟
-يعني اي ياعلي؟
-يعني أنا عندي الحل
-اي هو؟
-الحل أن حسام يعرفك كويس الأول ،يعرف شخصيتك وانك مش أنانيه ولا طماعه ولا محتاجه فلوسه ، لازم حسام يحبك الاول عشان يتقبلك فحياتهم
-وده هيكون أزاي أصلا وهو مش قابل حتي يشوف وشي
-أنتي هترجعي الشركه مكان أحمد وهتمسكي كل مشاريع الصفقات اللي بين شركتنا وبين شركة حسام وبكدا هيبقا مضطر غصب عنه يشوفك ويتكلم معاكي ،التعامل فالاول هيبقا صعب جدا معاه عشان كدا بسألك تقدري تتحملي قد اي ياود؟
-هتحمل ياعلي ، هتحمل كل اللي هيعمله بس كدا هو ممكن يلغي الشغل بين الشركتين
-لأ لأن حسام عارف أنه لو عمل كدا هيسبب خسارة كبيرة لشركته ،غير الشروط الجزائيه اللي هيضطر يدفعها وحسام شخص عاقل معتقدش انه يفكر فخسارة كبيرة بالشكل ده
-يعني أنا هشوفه واقدر اتكلم معاه؟
-كل اجتماعات الشركتين انتي اللي هتحضريها وكل المشاريع انتي اللي هتديريها وبكدا هيبقا تعاملك بشكل شخصي وجه لوجه مع حسام وفالوقت ده هتقدري تقربي منه وتخليه يفهمك ويعرف الحقيقه ويصدق انك ملكيش ذنب ولا كنتي تعرفي حاجه عن كل اللي حصل ده
-تفتكر هيصدق؟
-لما هيتعامل معاكي وهيعرفك كويس اكيد هيصدق
-اتمني ياعلي
-جهزي نفسك لأنك من بكرة هتنزلي الشركة
-أنا جاهزة من دلوقت .
-يبقى ندعي ربنا يسهل الامور
-ياااااااارب
**
كانت شايفاه طول الوقت مهموم وحزين عشان اللي حصل مع ود وازاي بيحاول يساعدها ، قلبها بدأ يحن ،حست انه من حقه تطبطب عليه وتكون معاه في حزنه وتشاركه همه ، الفتره الصغيره اللي عاشتها معاه عرفتها شخصيته كويس ،قد اي هو إنسان مسؤل وواعي وقد اي بيحب الكل وبيحب يساعدهم وقد اي بيتضايق عشانهم ، كانت بتسأل نفسها
-لسه فيه فالدنيا إنسان زيك ياعلي ،أنا كنت فاكرة أن الناس دي خلصت مع آدم ؟
احيانا بيلفت نظرها ان عنده صفات مشتركه مع آدم وللحظه بتحس أن اللي قدامها آدم مش علي
بس بتفوق علي صوته وبتلاقي ان كل ده كان خيال ووهم وبس ،زي ما فاقت من شرودها علي صوته وهو جمبها
-لو الواحد هيصحى كل يوم علي القمر ده فأنا مستعد أحول العالم لسما تستني بس ظهورك
-هاااااا، بتقول أي؟
-لأ أنا بكلم طبق البيض اللي قدامك ده
-اهااا
-ملك
-نعم ياعلي
-انتي كويسه ،صح؟
-أيوة الحمدلله
-طيب ليه معظم الوقت بشوفك شارده كدا؟
-بفكر في مشكلة ود بس وكمان زعلها من مرات عمي ، متقلقش عليا أنا بخير
-ويهمني مين غيرك أقلق عليه
نزلت دمعه طايره منها ،الجمله فكرتها بآدم ،كانت كل ماتقوله متقلقش يرد بنفس الجمله ،حست انهم مش مشتركين فالصفات وبس ،حتي الكلام كان ليه نصيب مشترك بينهم
-حتي واحنا بنتكلم شردتي تاني؟
-لا انا معاك اهو
-ياااارب دايما معايا
-مش هتفطر طيب
-بشرط تفطرى معايا
-طيب
قعدوا يفطروا سوا ،ودي أول مره تقعد معاه علي سفرة واحده ،قلبه كان بينبض بفرح وحس أن أخيرا القدر قرر يكون معاه
**
شيماء_عبدالحميد
**
وصلت الشركه جمعت كل مشاريع الصفقات بين الشركتين ودرستها كويس جدا وبعدها كلمت أحمد
-اي رأيك لو روحت اجتماع انهاردة بدل علي؟
-بالسرعه دي ياود؟
-ايوة يا أحمد مش قادرة أصبر
-بس انا مش متطمن ،اجي معاكي طيب؟
-لا طبعا يا أحمد
-طيب أنا مش هتطمن غير لما يكون حد معاكي
-زى مين؟
-رؤيه مثلا ،انا هكلمها واقولها تروح مع حسام شركته انهارده عشان لو اتعصب عليكي تهديه
-أوك
أحمد كلم رؤيه بالفعل ووافقت ،وصلت ود الشركه والسكرتيرة دخلتها اوضه الاجتماعات ،دخلت بعدها رؤيه
-كويس انك جيتي يارؤيه عشان تهديه
-اهدي مين يابنتي دا أنا اكتر واحدة بتعصبه ،هو بيشوفني قدامه بس بيتعصب علي طول
-الله يطمنك ياختي
دخل حسام علي اساس ان علي اللي هيحضر الاجتماع واتفاجىء بود قدامه
-أنتي اي اللي جابك هنا????؟
-جايه احضر الاجتماع يا استاذ حسام
-بأي صفه؟
-بصفتي المسؤله عن كل المشاريع بين الشركتين
-اهاااا ،دا انتي واحمد بتلعبوا علي كبير بقا
-يعني اي؟
-يعني اطلعي بره
-والاجتماع
-بلغيهم ان كل الصفقات اللي بينا اتلغت
يتبع

رواية / حدود القدر – ج2
بقلم / شيماء عبدالحميد
الحلقة 4
.
.
-بلغيهم ان كل الصفقات اللي بينا اتلغت
-أنت مدرك انت بتقول اي ياحسام؟
-ايوة مدرك يامدام ود
-بلاش عصبيتك تدمرك ياحسام ، انت كدا هتتسبب فخساير كبيرة لنفسك
-لو الخساير دي نتيجتها اني مشوفكيش تاني فده أكبر مكسب ليا
-بس انا مش هقبل بكدا
-يعني اي؟
-يعني مش هسمح ان الصفقات تتلغي
-يلا بره
**
“مركز الحياة ، احيانا بيكون مركز الحياة شخص واحيانا بيكون شيء وهدف معين ، حياتك بتتمحور علي هدف لابد من الوصول له ، وهو كان الهدف ده ، فكرة أن الانسان اللي حبته واختارت تكمل معاه الحياة يخونها كانت صعبه اوووووي ، والشك لما بيتسرب لقلب الست بيدمر قوة العلاقه والحب جواها ”
كانت حاسه بالوجع ،فرحتها بأن جواها طفل بيكبر كل يوم عن اللي قبله اختفت وحل مكان الفرح وجع خيانه وخداع ، التعامل بينها وبين عمر بقا محدود رغم انهم في بيت واحد إلا أنهم ابعد مايكون عن بعض ، لسه بتدور علي اي خيط يوصلها لخيانته ولسه هو مش فاهم اللي بيحصل ولا فاهم هي اتغيرت ليه قرر يواجهها بده
-حور أنا عايز افهم في اي؟
-في اي ياعمر؟
-طول الوقت حزينه وكلامك معايا بقا قليل جدا وانا مش متعود منك علي كدا
فكرت انها تواجه وتسأله عن سر اسم ريناد بس تراجعت ، حست انه هيكذب وهيخبي ولو فيه شيء يوصلها لأي خيط لخيانته ممكن يخفيه
-الحمل تاعبني بس
-تحبي نروح لدكتور؟
-لأ ،هبقا كويسه
-طيب ياحور
**
تعب لوحده ،الوحده بتتعب وخاصة لو الندم مصاحب ليها ،ندمه علي كل اللي عمله كان بيعذبه ، فكر انه يرجع يعتذر من علي بس خلاص الفلوس خسرها ومش هيقدر يرجعها عشان يسامحه فقرر يرجع لوالدتها علي أمل انها تسامح
-مصطفى
-أزيك يا أمي
-اي اللي جابك هنا؟
-جاي عشانك
-انت ملكش حد هنا يامصطفي، امشي
-انا مليش حد غيرك يا أمي
-أنت بعتني قصاد الفلوس يامصطفى
-انتي اللي بعدتي يا امي واخترتي تبعدي
-امشي يامصطفى
-أنا خسرت كل حاجه
-يعني اي؟
-خسرت كل فلوسي
-مكنتش فلوسك من البدايه
-واديني خسرتها
-ودلوقت رجعت لما خسرتها؟
-سامحيني يا أمي ،والله ماهعمل حاجه تزعلك تاني
قرب منها وعيونه مليانه دموع
-طيب يابني ،بس دي أخر مرة هسامحك فيها
**
كان بيحب يشوفها طول الوقت ، عايزها معاه ولو بعيدة ، كان بيبتسم تلقائي أول مايشوفها
وكان بيحس انه محتاجها معاه طول الوقت
-مش حابه تشتغلي ياملك؟
-احيانا بحس اني مخنووقه من البيت ومحتاجه اخرج
-طيب اي رأيك ترجعي تكملي فالشركه معانا؟
-اممم ، بس انا مش بفهم اوووي في شغلكم
-هفهمك ،رغم ان وجودك وحده يكفي
-طيب هفكر
وجودها بس قدامه يكفي ،يكفي انه يسرق تركيزه بالكامل ويخطف نظره ، بس كل تفكيره ازاي يسعدها وبس ،بدأت علاقتهم تتحسن مع الوقت وبدأت تقوي ،كتير بيشوف ان الحب هو المقوي لاي علاقه رغم ان الاحترام والتفاهم اقوي بكتير اووووي منه.
**
رجعت الشركه مخنوقه وبتعيط اول ماشافها علي اتخض لكن احمد كان متوقع النتيجه وعارف ان ده اللي هيحصل
-حصل اي ياود؟
-طردني ياعلي????
-اي؟
-وقالي انه لغي كل الصفقات بين الشركتين
-بس ده مش قراره لوحده
-قولتله ان كدا بيدمر شركته ، قالي خسارته مكسب لو هتبعدني عنه
-للدرجه دي ؟
وقف أحمد ورد عليه
-واكتر ياعلي ،انت نسيت طبع حسام ولا اي
-انا هتكلم معاه
قبل مايكملوا كلامهم كان حسام واقف علي باب المكتب ،خبط الباب ودخل ،كان بيبص لعلي بغضب شديد ظاهر علي ملامحه
-انتي باعتلي دي ليه وازاي؟
-اهدى وخلينا نتكلم ياحسام
-لو هي اللي هتكون الوسيط بين الشركتين فشغلنا هينتهي
-مش من حقك تقرر ده لوحدك ،ده غير انك هتخسر كتير
-وانت بتلوي دراعي ،صح؟
-ليه بتفكر بالشكل ده
-تصرفكم ملهوش غير شكل واحد
حاول علي يهديه وطلب منه يقعد ورفض
-خلي البني آدمه دي تمشي من قدامي عشان أقعد.
اتعصب أحمد جامد
-في اي ياحسام ماتتكلم بأدب شويه
-كلامي مش موجه ليك يا أحمد
-راعي انك بتتكلم عن مراتي
-مراتك دي السبب فموت امي هي واهلها.
-اتكلم كويس انت مش بتتكلم عن مجرمه
-صح مش مجرمه بس رخيصه وبنت ست رخيصه
مسك فيه أحمد والخناق أشتد بينهم جامد لحد ماوقعت اغمى عليها من اللي حصل قدامها وكلام حسام عنها
**
طول الوقت في أوضة آدم بتبكي وبس ، بتتحاسب علي ذنب ملهاش يد فيه ولو كانت وقفت قصاده كانت هتخسر ولادها ، ولما موقفتش قصاده خسرتهم برضو ،آدم مشي وفارق وود سابتها ومشيت ،قعدت علي سجادة الصلاة وقلبها بيأن وجع وحسره علي فراقهم
-أنا مش بلوم القدر علي عناده ولا الحدود اللي حطها قدامي يااااارب ،ولا مش زعلانه علي مشيئتك بس غصب عني تعبت ، انا مليش ذنب فكل ده ، أنا عرفت انه متجوز ومخلف بعد مابقيت مراته واما فكرت أبعد كان بيهددني بولادي ، أنت عارف اني مليش ذنب فأكرمني بالقوة اللي
تخليني أقدر اتحمل اتهام بنتي ليا وفراقها ،واديني القوة اللي تخليني اقدر اواجه بيها ولاده يااااارب????
دق جرس الباب قامت تفتح علي امل تكون ود راجعه لحضنها من تاني بس املها خاب لما شافت اللي قدامها ملك مش ود ،حضنتها جامد وفضلت تعيط في حضنها
-والله يابنتي ماليا ذنب في كل اللي بيحصل ده
مكنش بأيدي حاجه ياملك
-انتي غلطتي ياطنط
-غلطت في اي بس يابنتي؟
-غلطتي لما خبيتي ،كان لازم تقوليلهم علي الاقل ،كان لازم تعرفيهم ان ليهم اخوات
-خوفت عليهم وخوفت علي زعلهم مني وخوفت اكتر يبعدوا زي ماحصل دلوقت????
اترمت في حضن ملك وفضلوا يعيطوا سوا
-مالك ياملك؟
-انا بظلم علي معايا ياطنط ، مش قادرة اوهبه الحب اللي يستحقه ولا قادرة اتقبله كجوز ليا ، مش قادرة انسي آدم ،بشوفه طول الوقت قدامي وكأنه بيعاقبني علي جوازي من حد غيره ،بشوفه فمنامي وكأنه زعلان مني ، وكل ما ابص في عيون علي بشوف لوم وعتاب ،بحس اني ظلمته اوووووي ،أنا تعبانه ومش عارفه اعمل اي .
-انسي ياملك ،حاولي تنسي عشان تقدري تعيشي يابنتي
-انسي ازاي ، والله مش قادرة
-ملهاش حل تاني يابنتي
-أنا قررت اني مظلمش علي اكتر من كدا معايا ،احساسي بعذاب الضمير تاعبني اوووي فقررت ارتاح
-يعني اي ياملك؟
-أنا هطلب الطلاق
-انتي بتهزري ،صح؟
-للأسف لأ
-تبقي محتاجه اللي يفوقك ،فوقي ياملك آدم خلاص انتهى ومش معني كدا انك تنهي حياتك معاه ،آدم مش راجع تاني ،علي هو مستقبلك يابنتي ،بلاش تخسريه وإلا الندم هيبقى أكبر ،واديله الحق انه يقرب منك ويدخل حياتك ، اديله الحق فمكان جواكي عشان يقدر مع الوقت يحل محل آدم ، آدم كان ماضيكي لكن علي حاضرك ومستقبلك ياملك افهمي بقا.
وقعت ايدها علي فون آدم جمبها فظهرت صورته وفضلت تعيط ، افتكرت باقي الملفات والاسم اللي اتفتح بيه ملف الصور ،قررت تجرب الرمز علي باقي الملفات وبالفعل اتفتح معاها أول ملف
كان عباره عن فديوهات عاديه ، فتحت الملف التاني وكان برضو صور ،فتحت ملف تالت وكان عبارة عن صور لأوراق كتير اوووووي ،حاولت تفهم اي الاواق دي بس معرفتش ،قررت تاخد الفون معاها وتسأل أحمد علي الاوراق دي واي اللي فيها
**
أول ماشافها وقعت قدامه واحمد وعلي جريوا عليها وكانوا قلقانين جدا مشي ، طول الطريق بيلوم نفسه بس مش عارف علي اي ، علي اللي حصلها بسببه ولا علي الكلام اللي قاله ولا علي خناقه مع أحمد ،للحظه شاف فعيونها دموع بتقوله انها ملهاش ذنب وانها فعلا مكنتش تعرف حاجه بس عقله بيكدب نظرته ليها وبيقوله لأ كدابه وهي السبب فكل شيء ، وصل البيت وكانت تعبان جدا وبمجرد ماشاف رؤيه اترمى في حضنها وفضل يعيط زي طفل صغير
-أول مره أشوفك بالضعف ده ياحسام
-تعبان اوووي يارؤيه
-انت اللي تاعب نفسك ياحبيبي بدون سبب
-ازاي بدون سبب؟
-ود ملهاش ذنب فحاجه ياحسام
-وامي مكنش ليها ذنب يتعمل فيها كل ده
-انت كدا بتظلم
-أنا تعبان اوووووي ، مش قادر اسامح في حق ماما ولا قادر ارجع الحق ده وانتقم ولا متحمل اشوف حد بيتعذب قدامي ،بجد تعبان ،تعبان اوووووي
-طيب يا حسام ،اهدى عشان خاطري
حاولت تهديه لحد ماهدى ونام من التعب
**
فاقت علي صوت دافي جمبها ،حست بلمسه هاديه ،فتحت عيونها وكانت جمبها ،حست انها بتتخيل فبصت لأحمد اللي هز راسه بأيوة وبيأكد وجودها ،قامت وقربت منها ،كان نفسها تاخدها في حضنها
-انتي اختي ،صح؟
-ايوه ياحبيبتي ،أنا اختك ياريناد
-انتوا السبب في اللي حصل لماما؟
-لا ياريناد والله ماليا ذنب
-أنا حاسه بكدا
حضنوا بعض جامد ونزلت دــ..ـموع الفرحه منهم
-متزعليش من كلام حسام ياود
-مش زعلانه ياحبيبتي
-أنا هساعدك عشان نرجع كلنا عيله واحده
-بجد يايناد؟
-بجد ياود
**
فات يومين علي نفس الحال ،الكل مكتئب وحزين ، ريناد بتكلم ود علي طول وبتقولها عن الحجات اللي بيحبها حسام والحجات اللي بتعصبه ، واحمد طول الوقت فالمول مع عمر وحور لسه بتدور عن بداية الخيط اللي هيوصلها لسر اسم ريناد اما علي واقف مكانه مش عارف اي اللي لازم يعمله عشان يراضي الكل وشايل المسؤليه ،ورؤيه طول الوقت مع حسام بتحاول تساعده يخرج من حالة الحزن اللي حبس نفسه فيها ، مصطفى رجع يخطط لمستقبله وازاي يقدر يرجع شغله من تاني
شافت علي قاعد فاضي فقررت تسأله عن الورق وتفهم اللي فيه
-ممكن اطلب مساعده منك؟
-اي السؤال الغريب ده ياملك ، انتي تطلبي اللي عيزاه وانا اعمله
مديتله الفون
-ممكن تقولي اي الاوراق دي واي اللي فيها؟
مسك الفون وبدأ يقلب في صور الورق ويقراها
وفي كل ورقه كان بيوضحلها اي اللي موجود فيها
-ورق بيخص تمويل بنوك وتقديم لقروض ياملك.
-ازاي؟
-يعني آدم كان مقدم علي قروض من البنك بضمان البيت اللي عايشين فيه
-ازاي ياعلي ؟
-ده اللي فالورق اللي قدامي
-غريبه ،طب وآدم هيعمل ليه كدا؟
-مش عارف
-يمكنعشان كان نفسه يشتري المول مثلا فقدم علي القروض دي
-ايوة بس القروض دي اتوافق عليها
-يعني اي؟
-يعني آدم خد الفلوس
-لأ مستحيل ،آدم اكيد معملش كدا
-بس الورق بيقول ان القرض اتصرف يعني آدم خد الفلوس.
-طب الفلوس دي فين؟
-ممكن تكون والدته عارفه
-لأ معتقدش ، طيب كمل باقي الورق
فتح الصوره اللي بعدها واتصدم لما شافها ،ملامحه اتغيرت والحيرة ظهرت علي وشه
-في اي ياعلي؟
-هاااااا ،مفيش
-فيها اي الورقه دي؟
حاول يخبي الفون منها
-لا لا مفيهاش حاجه دي فاضيه
حست انه فيها سر جامد وبيحاول يخبيه
-علي في اي
-مفيش ياملك؟
-انت مالك اتعصبت كدا ليه؟
-خلاص ياملك قولتلك مفيش
خطفت الفون منه ،واول ماعيونها قرت المكتوب وقعت قدامه فاقدة الوعي
.

الحلقة 5

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى